Wednesday 4 November 2015

ഭൂമി കയ്യടയ്ക്കുന്ന ന്യൂനപക്ഷങ്ങൾ... സംഘി നുണ...

ഹിന്ദുക്കളിൽ അനാവശ്യ ഭീതിയും, അവരിൽ ചിലരെ കൃസ്ത്യൻ-മുസ്ലീം വിരുദ്ധരാക്കാനും സംഘികൾ പടച്ചുവിടുന്ന അനേകം നുണകളിൽ ഒന്നാണ് ന്യൂനപക്ഷങ്ങൾ കേരളത്തിലെ ഭൂമി കയ്യടയ്ക്കുന്നുവെന്നത്... നിയമപ്രകാരം കയ്യടക്കുന്ന ഭൂമിയാണെങ്കിൽ അതിൽ പ്രശ്നമൊന്നുമില്ലല്ലോ... അല്ലേ... പക്ഷേ അതിലേക്ക് കപ്പലിൽ പണം വന്നതും പാകിസ്ഥാൻ-ഗൾഫ് വഴിയും അമേരിക്കൻ-യൂറോപ്യൻ വഴിയും വരുന്ന കള്ളപ്പണം / ഹവാല പണം ഭൂമി വാങ്ങാൻ ഉപയോഗിക്കുന്നുവെന്നൊക്കെ മസാല ചേർത്ത് പ്രചരിപ്പിക്കുന്നു... നിയമപരമായതും അല്ലാത്തതുമൊക്കെ സർക്കാർ അന്വേഷിക്കട്ടെ... വിദേശ പണമൊക്കെയല്ലേ, സംഘി സർക്കാരും അന്വേഷിക്കട്ടെ... എന്റെ കൈയ്യിൽ ഡാറ്റയില്ല... അതേസമയം നമ്മുടെ കൺമുന്നിൽ കണ്ട ഭൂമി കച്ചവടം എഴുതട്ടെ... മനസിൽ തോന്നിയത്... അതുകൊണ്ട് ഡാറ്റയുമില്ല...

കേരളത്തിലെ ബഹുഭൂരിപക്ഷം വരുന്ന ജന്മിമാർ ഹിന്ദുക്കളായിരുന്നു... ഹിന്ദുക്കളെന്ന് മാത്രം പറഞ്ഞാൽ അങ്ങട് കൃത്യമാകില്ല... സവർണ്ണ ഹിന്ദുക്കൾ... അവരുടെ കൈയ്യിലിരുന്ന കുറെ ഭൂമികൾ എങ്ങനെ മറ്റുള്ളവരുടെ കൈയ്യിലെത്തിയെന്ന് ശാഖയിൽ പഠിപ്പിക്കുന്നില്ല, അതുകൊണ്ട് എഴുതട്ടെ... 

1... ഭൂപരിഷ്കരണം - എല്ലാ മതത്തിലുമുള്ള ജന്മിമാരുടേയും മിച്ച ഭൂമി സർക്കാർ പിടിച്ചടക്കി വിതരണം നടത്തിയിട്ടുണ്ട്... അതിലും ഏറ്റവും കൂടുതൽ ഭൂമി കിട്ടിയത് ഈഴവർക്കാണ്... അവരും ഹിന്ദുക്കളാണ്... അല്ലേ... 

2... മലയോര മേഖലയിലേക്കൂള്ള കുടിയേറ്റം... കണ്ണെത്താത്ത ദൂരത്തിലുള്ള ഭൂമിയുടെ ജന്മിമാർ, ദേ ആ കാണുന്ന വലിയ ആഞ്ഞിലി മുതൽ ആ കാണുന്ന കുന്ന് വരെ... അഞ്ച് ഏക്കർ കാണും... പിന്നെ കാര്യസ്ഥനാണ് അതിര് കാണിക്കാൻ പോകുക... വില നൽകി ജന്മിമാരുടെ കൈയ്യിൽ നിന്ന് വാങ്ങിയതാണ്... പണിയെടുക്കാതെ തിന്ന് നടന്ന ജന്മിമാരിൽ നിന്ന് ഭൂമി വാങ്ങി, ആ ഭൂമിയിൽ പണിയെടുത്താണ് ഇന്ന് കാണുന്ന കൃഷി തോട്ടമാക്കിയത്... മലമ്പനിയും കാട്ടുജീവികളുമായി മല്ലിട്ട് തന്നെ... അർഹതപ്പെട്ട വിജയമാണ്... ശാഖയിലിരുന്ന് കുശുമ്പ് പറയുന്ന നേരം മഠിയന്മാരായ ജന്മിമാരെ പള്ള് വിളിക്ക്... ഹിന്ദുസമൂഹത്തിൽ നിന്ന് കുടിയേറ്റം നടത്തുന്നതിന് വിലക്കൊന്നുമുണ്ടായിരുന്നില്ലല്ലോ...

3... ഗൾഫ് പണം... നാട്ടിൽ അഷ്ടിക്ക് വകയുണ്ടായിരുന്ന സമൂഹങ്ങൾ കടൽ കടന്ന് മരുഭൂമിയിലെത്തിയിരുന്നില്ല... ആദ്യകാലങ്ങളിൽ ഉരുകളിൽ എത്തുകയായിരുന്നു... അങ്ങനെ എത്തിയവരിൽ ഭൂരിഭാഗവും മുസ്ലീം സമൂഹവും കൃസ്ത്യൻ സമൂഹമായിരുന്നു... അതും വിദ്യഭ്യാസമില്ലാത്തവർ / ചെറിയ വിദ്യഭ്യാസമുള്ളവർ... അവരൊക്കെ നാട്ടിൽ ഭൂമി വാങ്ങുകയും വീട് വെയ്ക്കുകയും ചെയ്തു... വിദ്യഭ്യാസമുള്ള സവർണ്ണ ജാതിയിൽപ്പെട്ടവരൊക്കെ ഗൾഫിലേക്ക് വന്ന് തുടങ്ങിയത്, 90 കൾക്ക് ശേഷമാണ്... അതുവരെ നാട്ടിൽ തന്നെ ജോലി എന്ന മനോഭാവമായിരുന്നു... അതിന് മുൻപേ ഈഴവർ ഗൾഫിലേക്ക് വന്ന് തുടങ്ങിയിരുന്നു... അവരും ഭൂമി ഉടമകളായിട്ടുണ്ട്...

4... യൂറോപ്യൻ-അമേരിക്കൻ പ്രവാസം കൃസ്ത്യാനികളെ ഭൂവുടമകളാക്കുന്നതിൽ ഗണ്യമായി സഹായിച്ചിട്ടുണ്ട്... അവരിൽ ബഹുഭൂരിപക്ഷവും അവിടെ എത്തിയത് നേഴ്സിംഗ് മേഖലയിലൂടെയാണ്... അവഗണനയും പരിഹാസവും നില‌നിൽക്കുന്ന തൊഴിൽമേഖലയായിരുന്നു... അതിലൂടെ മുന്നേറിയ ജനവിഭാഗം ലോകം മുഴുവൻ സഞ്ചരിച്ച്, ജോലി ചെയ്ത് നാട്ടിൽ കുറച്ച് ഭൂമി വാങ്ങുന്നതിൽ എന്താണ് ശരികേട്... ശാഖയിലിരുന്ന് കുശുമ്പ് പറയുമ്പോൾ, എന്തുകൊണ്ട് നമ്മുടെ ഹിന്ദുക്കൾ ആ തൊഴിൽ മേഖലയെ അവഗണിച്ചു എന്നന്വേഷിക്കൂ... 

5... 2000-ന് ശേഷമാണ് ഇന്ന് കാണുന്ന രീതിയിലുള്ള റിയൽ എസ്റ്റേറ്റ് ഭൂമി വാങ്ങലുകൾ സാധാരണക്കാരുടെയിടയിലേക്കെത്തിയത്... അതുവരെ കൃഷി ചെയ്യുകയെന്ന ഉദ്ദേശ്യത്തോടെ ഭൂമി വാങ്ങുന്ന കർഷകരായിരുന്നു നമുക്ക് ചുറ്റും... കൃഷി ചെയ്യുന്നത് കുറ്റകരവുമല്ല...

വാൽകക്ഷണം... നാട്ടിൽ തെണ്ടി തിരിഞ്ഞ് നടന്നവൻ, ഗൾഫിലെത്തി പത്ത് പുത്തനുണ്ടാക്കി... നാട്ടിൽ ഭൂമിയും വാങ്ങി വീട് വെച്ച് കഴിയുമ്പോൾ... ഓ, അതൊന്നും നേരായ മാർഗ്ഗത്തിലൊന്നുമല്ല, ഇവിടെ തേങ്ങ മോഷ്ടിച്ചതിന് പിടിച്ചിട്ടുള്ളതാണ്... അതുതന്നെയായിരിക്കും അവിടേയുമെന്ന് കലുങ്ങിലിരുന്ന് കുശുമ്പ് പറയുന്ന സമയം പണിയെടുക്കാൻ നോക്ക്... കുറെ കഴിയുമ്പോൾ എല്ലാവർക്കും ആവശ്യമുള്ള ഭൂമി വാങ്ങാം... അത് ഏത് സമുദായക്കാരാണെന്ന് അന്വേഷിക്കേണ്ടതുമില്ല...

Tuesday 3 November 2015

സിഖ് വിരുദ്ധ കലാപം - വെറുപ്പും ഭയവും

പഞ്ചാബിലെ തുടർച്ചയായ ബോംബ് സ്പോടനങ്ങളും പോലിസ് ഏറ്റുമുട്ടലുകളുമായി, സിംഖുകാരൊക്കെ താടിയും തോക്കുമുള്ള ഇന്ത്യ വിരുദ്ധർ / തീവ്രവാദികളെന്ന എന്ന പ്രതിഛായ ഇന്ത്യ മുഴുവനും വ്യാപിച്ചിരുന്നു... ഖാലിസ്ഥാൻ തീവ്രവാദത്തെ അടിച്ചമർത്തി ദേശീയ ഐക്കണായി നിൽക്കുന്ന സമയത്താണ് സിഖ് അംഗരക്ഷകരാൽ ഇന്ത്യൻ പ്രധാനമന്ത്രി / "കോൺഗ്രസ് നേതാവ്" കൊല്ലപ്പെടുന്നത്... സിഖ് വിരുദ്ധ മനോഭാവം ഇന്ത്യ മുഴുവനും അലയടിച്ചിരുന്ന സമയമായതുകൊണ്ട് സിഖുകാർക്കെതിരെയുള്ള രോഷം കലാപത്തിലേക്ക് നയിക്കുമെന്നത് കൊച്ച് കുട്ടിക്കുപോലും മനസിലാകുമായിരുന്നു... സിഖുകാരാനായതുകൊണ്ട് ഇന്ത്യൻ പ്രസിഡന്റിന്റെ വാഹന വ്യൂഹത്തിന് നേരെ കല്ലേറുണ്ടായത് ഒരു അളവുകോലായി ഇന്ത്യൻ സർക്കാരും കോൺഗ്രസും ഏറ്റെടുത്തിരുന്നുവെങ്കിൽ, ഒറ്റപ്പെട്ട അക്രമം എന്നതിനപ്പുറത്തേക്ക് സിഖ് വിരുദ്ധ കലാപം വളരുമായിരുന്നില്ല... മതിയായ മുന്നറിയിപ്പുകൾ ഭരണക്കാർക്ക് ലഭിച്ചിരുന്നു... പോലിസിനേയും പട്ടാളത്തേയും വ്യന്യസിക്കാനുള്ള സമയം... ജനത്തെ ശാന്തരാക്കാനുള്ള ശ്രമങ്ങളൊന്നും നേതാക്കൾ ചെയ്തിരുന്നില്ല... പകരം ആളിക്കത്തിക്കാനുള്ള ശ്രമങ്ങളായിരുന്നു നടന്നത്... പോലിസ് നിസംഗത പുലർത്തി...

"ഒരു വന്മരം വീഴുമ്പോൾ ചുറ്റുമുള്ള സ്ഥലം കുലുങ്ങുന്നത് സ്വാഭാവികമാണെന്ന" രാജീവ് ഗാന്ധിയുടെ പ്രസംഗം കൊല്ലപ്പെട്ട ആയിരക്കണക്കിന് സിഖ് വംശജരുടെ നെഞ്ചിൽ കയറി നിന്നുകൊണ്ടായിരുന്നു... കോൺഗ്രസിനും രാജീവ് ഗാന്ധിക്കും ഈ കൂട്ടക്കൊലയുടെ കറ മായ്ച്ച് കളയാൻ ഇതുവരെയായിട്ടില്ല...

എന്റെ അഭിപ്രായത്തിൽ ഇന്ദിരഗാന്ധി കൊല്ലപ്പെട്ടതുകൊണ്ടോ അതല്ലെങ്കിൽ കോൺഗ്രസ് നേതാക്കൾ സിഖ് വിരുദ്ധ കലാപം ആളിക്കത്തിക്കാനിറങ്ങിയതുകൊണ്ടുമല്ല 3,000 സിഖുകാർ കൊല്ലപ്പെട്ടതും 20,000 ഓളം സിഖുകാർ ഡൽഹി വിട്ട് ഓടിപോയതും... അതിന് മുൻപെ അതിനുള്ള വഴിമരുന്നു ഉണ്ടായിരുന്നു... ഒരു സിഖ് വിരുദ്ധ മനോഭാവം... അതുതന്നെയാണ് ഗുജറാത്ത് കലാപത്തിന്റേയും ഇന്ധനം...വംശീയ തുടച്ച് നീക്കലുകളെല്ലാം തന്നെ അത്തരം വെറുപ്പിന്റേയും ഭയത്തിന്റേയും ഉൽപ്പന്നങ്ങളാണ്...

കൂട്ടക്കൊല / ഫാസിസം എന്നതിലൊക്കെ നമുക്ക് തർക്കിക്കാം... സമയം കിട്ടുമ്പോൾ അതിനിരയായ സമൂഹത്തിന്റെ ഷൂസിലൊന്ന് കയറി നിന്ന് നോക്ക്... നമുക്ക് മനസിലാകും... അതെത്ര ഭീകരമാണെന്ന്... 

https://ml.wikipedia.org/wiki/1984_anti-Sikh_riots