ബാരക്കും തിരുത്തൽ രേഖയും പിന്നെ എന്റെ പോസ്റ്റുകളും!

ജ്വാലിയെല്ലാം കഴിഞ്ഞ്‌ ബാരക്കിൽ എത്തി നേരെ പോയതു ബ്ലോഗിലെ എന്റെ കമാന്റ്‌ ബൂത്തിൽ. കമാണ്ടോകൾ പോയിട്ട്‌ നാടൻ പൂച്ച പോലും ഇല്ല. എന്റെ "കിടില്ലൻ" പോസ്റ്റുകൾ എല്ലാം തന്നെ വായനക്കാർ തിരുത്തൽ രേഖയൊന്നും സമർപ്പിക്കാതെ ബാരക്കിൽ ഭദ്രമായി കെട്ടിപ്പൂട്ടിവെച്ചിരിക്കുന്നത്‌ കണ്ടപ്പോൾ, എനിക്കു സഹിച്ചില്ല, ഈ പോസ്റ്റുകളുടെ പെറ്റ തള്ളയല്ലേ.. സഹിക്കോ?

കമാന്റുകളുടെ എണ്ണം ഒന്നുമല്ല ബ്ലോഗിന്റെ നിലവാരം, എന്നാലും നമ്മുടെ ബാരക്കിൽ കുറച്ച്‌ തേങ്ങ കിടക്കുന്നത്‌ നല്ലതല്ലേ, ഗണപതിക്ക്‌ ഉടയ്ക്കാനെങ്ങിലും.

എന്റെ വലത്‌ ചിന്തകൾ തിരയ്യൽ ഭീമൻ ഗൂഗ്ലിന്റെ (നമ്മുടെ അന്നദാതാവും!) സഹായത്തോടെ കണ്ടുപിടിച്ച സരസ്വതി ശാപം എന്ന പിൻതിരിപ്പൻ കാരണത്തിൽ തൂങ്ങി കിടക്കാൻ എന്റെ ഇടതു ചിന്തകൾ സമതിച്ചില്ല, ഇടതന്മാർ അങ്ങനെയാണല്ലോ, ഒന്നും സമ്മതിക്കില്ല. കമന്റ്‌ കണ്ടിലെങ്ങിൽ ബൂത്തിലും തപ്പണം എന്നാണല്ലോ പ്രമാണം. അങ്ങനെ എന്റെ ഇടതു തിരയൽ ചെന്നെത്തിയത്‌ വി.എസ്‌ തുറന്ന്‌ വിട്ട ബാരക്കിൽ തന്നെ.

എന്റെ പോസ്റ്റിൽ കമന്റിടാൻ ഞനൊരു ബൂത്തും തുറന്ന്‌ വച്ചിട്ട്‌ കാലം എത്രയായി. സനാഥനായ ഞാൻ ഈ ഭുമി മലയാള ബ്ലോഗിൽ മാത്രം എങ്ങനെ അനാഥനായി? കണ്ണൂർ മോഡലിൽ കമന്റിടാൻ എന്നെ നിർബന്തിക്കരുത്‌. ഇലക്ഷൻ ഒക്കെ കഴിഞ്ഞില്ലേ, എന്റെ കമാന്റ്‌ ബൂത്തിൽ നിന്ന്‌ ആ സേനയെ പിൻവലിച്ചൂടെ. എന്റെ ബൂത്തിലും ആരെങ്ങിലും അലഞ്ഞ്‌ നടക്കട്ടെ.

വി.എസ്‌ അടിച്ച്‌ ബാരക്കിലേക്ക്‌ കയറ്റിയ സൈനികരെ തിരഞ്ഞെടുപ്പു കമ്മിഷൻ ഇലക്ഷന്‌ തൊട്ടുമുൻപു തന്നെ അടിച്ചിറക്കി ബൂതിൽ കയറ്റിയതാ, പക്ഷെ ആ ബാരക്ക്‌ പ്രേതം ഗതി കിട്ടാതെ കേരളത്തിൽ അലയുകയാണ്‌.

ബാരക്ക്‌ പ്രേതം കയറിയ ചെന്നിത്തല പറയുന്നത്‌ അടുത്ത ഇലക്ഷനോടെ വി.എസ്‌ ബാരക്കിൽ ഇരിക്കും. ചെന്നിത്തലയെ വിട്ട്‌ ബാരക്ക്‌ പ്രേതം നേരെ കയറി പിടിച്ചതു ധർമവേദിക്കാരെയും. അവരുടെ പ്രവചനം, 6-മാസത്തിന്‌ ശേഷം തിരഞ്ഞെടുപ്പു നടന്നാൽ വെള്ളാപ്പള്ളിയും ബാരക്കിൽ ഇരിക്കും. ശശി അടിച്ചു ബാരക്കിൽ കയറ്റിയ തിരുത്തൽ രേഖയും സൂക്ഷിക്കാൻ കാരാട്ടിനും വേണ്ടേ ഒരു ബാരക്ക്‌.

ഹർത്താലും ബന്തും കേരള ജീവിതത്തിന്റെ ഭാഗം ആയതുപോലെ ഈ ബാരക്ക്‌ പ്രേതവും നമ്മുടെ ജീവിതത്തിന്റെ ഭാഗം ആയിട്ടുണ്ട്‌, സംശയം ഉണ്ടെങ്ങിൽ റേഷനരി മന്ത്രിയോട്‌ ചോദിച്ചു നോക്ക്‌.

പറഞ്ഞ്‌ പറഞ്ഞ്‌ ബാരക്കിനൊരു പുതിയ മാനം വന്നുവൊ? പരാജയപെടുത്തി ഇരുത്തേണ്ട സ്ഥലമണോ ഈ ബാരക്ക്‌. ഇടതന്മാരുടെ ചൈനയിൽ അങ്ങനെയായിരിക്കും, ങാ?. വലതന്മാരുടെ അമേരിക്കയിൽ വിജയിച്ച്‌ വന്നവരെയാണ്‌ ബാരക്കിൽ ഇരുത്തുന്നത്‌ നോക്കു ബാരക്ക്‌ ഒബാമ ചിരിക്കുന്നില്ലേ (അമേരിക്കൻ ഇംഗ്ലീഷിൽ ബറാക്‌ ഒബാമ എന്നു പറയും).

നമ്മുടെ അതിർത്തി കാക്കുന്ന വീരജവാന്മാരും കഞ്ഞിക്‌ വകയുണ്ടാക്കാൻ എണ്ണപണം തേടി പോയവരും അന്തിയുറങ്ങുന്നതും ഈ വലതന്മാരുടെ ബാരക്കിൽ തന്നെ, തന്നെ തന്നെ...

വലതന്മാരുടെ ബാരക്കിന്‌ എന്റെ വിയർപ്പിന്റെ റെഡ്‌ സല്യൂട്ട്‌.

കാക്കര

എം.എ. ബേബിയുടെ പത്രസമ്മേള്ളന നീന്തൽപഠനകളരി

ബേബി സാർ,

പത്രത്തിലെ ക്ലാസിഫൈഡ്‌ പരസ്യങ്ങളിലൂടെ കണ്ണോടിക്കുമ്പോൾ (വണ്ടിയും ഓടിക്കും) എന്റെ കണ്ണ്‌ മിക്കപ്പോഴും ഉടക്കിയിരുന്നത്‌ "തപാൽ വഴി നീന്തൽ പഠിക്കാം" എന്നതിൽ ആയിരുന്നു. മറ്റു പരസ്യങ്ങളും ഒട്ടും മോശമായിരുന്നില്ല, വീട്ടിൽ ഇരുന്ന്‌ ലക്ഷങ്ങൾ സമ്പാദിക്കാം, ദാമ്പത്യസുഖത്തിന്‌, ഉപകാരസ്മരണ, ചൊറിച്ചിൽ മാറ്റാൻ ബിടെക്സ്‌, 20 വയസ്സ്‌ പൂർത്തിയായവർക്ക്‌ "എം.എ".

നീന്തൽ പഠിക്കാൻ അതിലുമെളുപ്പവഴി അനേഷിച്ചു നടന്ന എന്റെ കണ്ണിൽ ഇന്നലത്തെ താങ്ങളുടെ പത്രസമ്മേള്ളന നീന്തൽപഠനകളരി ഒന്ന്‌ കയറി ഉടക്കി. തേടിയ വള്ളി കാലിൽ ഉടക്കി എന്നൊക്കെ കേട്ടിട്ടില്ലേ? അ ഉടക്ക്‌ തന്നെ! പിന്നെ അങ്ങ്‌ ഇന്നലെ നീന്തി കയറിയത്‌, വെറും ഒരു പുഴയല്ല, കടലാണ്‌. ലോകചരിത്രത്തിൽ അങ്ങയുടെ പേര്‌ വെള്ളലിപികളിൽ എഴുതപ്പെട്ടു, ശരിക്കും പെട്ടു! ഒബാമ സഖാവിന്റെ വെള്ളമടി ഉച്ചകോടിയും ഇതേ വെള്ളലിപികളിലാണ്‌ എഴുതിയത്‌ എന്നുകൂടി അറിയുമ്പോഴാണ്‌ താങ്ങളുടെ മുങ്ങികുളിയുടെ പ്രാധാന്യം മനസിലാവുകയുള്ളു. സിനിമാ വൃത്തങ്ങളിൽ നിന്ന്‌ കേട്ട വാർത്ത വിശ്വാസിക്കാമെങ്ങിൽ, എല്ലാ സിനിമയിലും മുങ്ങികുളിയുടെ ഒരു രംഗം ഉണ്ടായിരിക്കും.

ഒരു ദിവസം കൊണ്ട്‌ ആർക്കും നീന്തൽ പഠിക്കാം, മൂക്ക്‌ പൊത്തിപിടിച്ച്‌ കുറച്ച്‌ നേരം മുങ്ങി കിടന്നാൽ ഭാഗ്യമുണ്ടെങ്ങിൽ ആർക്കും പൊന്തിവരാം പിന്നെ "കയ്യടിച്ചാൽ കാലടിച്ചാൽ വില്ലൊടിച്ചാൽ" നീന്തൽ ആയി എന്നും... സാറിന്റെ പത്രസമ്മേള്ളനക്ലാസ്സ്‌ ഒരിക്കൽ കൂടി മനസ്സിലേക്ക്‌ ആവാഹിച്ച്‌... സാറ്‌  പറഞ്ഞത്‌ പോലെ ശ്വാസം പിടിച്ച്‌, മൂക്ക്‌ ഒക്കെ ഒരുവിധം പൊത്തിപ്പിടിച്ച്‌, പുഴയിലേക്ക്‌ ഒരൊട്ട ചാട്ടം...

പിന്നെ ആരോ പറഞ്ഞുകേട്ടത്‌, മണൽ മാഫിയക്കാരാണ്‌ എന്നെ ഒരു വിധം മുങ്ങിതപ്പി പൊക്കിയെടുത്ത്‌ കരക്കിട്ടത്‌, അതും കഴിഞ്ഞ്‌ "എ" ക്ലാസ്സ്‌ പടങ്ങളിൽ കാണുന്നപോലെ, എന്റെ തള്ളിയ വയറിൽ ഒരു ഞക്കലും പൊക്കലും... ഞാൻ കണ്ണ്‌ തുറന്നപ്പോൾ മാഫിയക്കാരുടെ ഒരു നോട്ടം പിന്നെ ഒരു പിറുപിറുക്കൽ... വെളുപ്പാൻകാലത്ത്‌ പണി മെനക്കെടുത്താൻ, ചാവാനാണെങ്ങിൽ വേറേയെത്ര വഴികൾ! സാറിന്റെ ക്ലാസ്സിനെപ്പറ്റി ഞാനവരോടു പറഞ്ഞിട്ടില്ല, അതുകൊണ്ട്‌ അവർക്ക്‌ ഇപ്പൊഴും സാറിനോട്‌ ഭയങ്ങര ബഹുമാനമാണ്‌.

കുറച്ചു വെള്ളം കുടിച്ചാലെന്താ, എന്റെ ദാഹം മാറിയില്ലേ?

സാറിന്റെ സാരോപദേശം കേട്ട്‌, നീന്തൽ അറിയാത്ത ലക്ഷക്കണക്കിന്‌ കുട്ടികൾ മൂക്കുംപൊത്തി വെള്ളത്തിലേക്ക്‌ ചാടിയാൽ... ഏയ്‌, കുട്ടികൾക്ക്‌ നമ്മളേലും ബുദ്ധിയില്ലേ? എനിക്ക്‌ സാറിന്റെ നീന്തൽ കളരിയിൽ ഇപ്പൊഴും വിശ്വാസമാ. വിശ്വാസിക്കുന്നവർ ഭാഗ്യവാന്മാർ എന്തുകൊണ്ടെന്നാൽ സ്വർഗ്ഗരാജ്യം അവരുടേതാകുന്നു.

എന്നാലും ഇങ്ങനെയാണൊ ഒരു പരിപാടി അവതരിപ്പിക്കുന്നത്‌, നമ്മുക്കും ഇല്ലേ കുട്ടികൾ, അല്ലാതെ ശ്രീമതി ടീച്ചറുടെപോലെ, എല്ലാവരും മന്ത്‌ പ്രതിരോധ ഗുളിക കഴിച്ചോളു, ഞാൻ വീട്ടിൽ പോയി ഉൽഘടിച്ചൊള്ളാം... ടീച്ചറുടെ പ്രീഡിഗ്രിയേലും വലുതല്ലേ സാറെ, സാറിന്റെ ബി.എ. കേട്ടിട്ടില്ലേ "അവന്‌ ബി.എ.ക്കാരന്റെ ഗമയാ". എം.എ പരീക്ഷ എഴുതിയില്ലെങ്ങിലും, എല്ലാവരും സാറിനെ "എം.എ." യും ചേർത്തല്ലേ വിളിക്കുന്നത്‌! അതെങ്ങിലും ഓർക്കണ്ടേ?

താങ്കളെ പിൻതുടർന്ന്‌, എക്സൈസ്‌ മന്ത്രി ഗുരുദാസൻ, ഒരു കുപ്പി വിസ്കിയും കൊണ്ട്‌ മദ്യം എങ്ങനെ കുടിക്കാം എന്നുള്ള പത്രസമ്മേള്ളനകളരി നടത്തുമോ? കലികാലം. ആകെ ഒരു സമാധാനം ഉള്ളത്‌ ഒന്നൊന്നര വർഷം കൂടിയല്ലേ ഉള്ളു, എല്ലാം സഹിക്കാം, പിന്നെ നമ്മുക്ക്‌ ചാണ്ടിയുടെ മുടിയിൽ താജ്മഹൽ പണിത്‌ രസിക്കാമല്ലോ, ചെന്നിത്തലയും അന്തോണിയും സമ്മതിച്ചാൽ!